VIER!

SILLY!

2006-10-26T17:53:00.000+02:00

Al ooit gevoel jy is te skaam om met iemand sommer net te praat oor Jesus? Wel, ek ervaar daagliks daardie gevoel. Nie oor ek nie 'n ekstrovert is of skaam is om met mense te praat nie, maar dis die onderwerp!

Sien, dis moeilik om "Jesus-talk" te praat sonder om te klink soos 'n idioot of sommer net plein "silly" te voel daaroor. ( Ek bedoel...watter goeie herder sal al 99 sy skape los en gaan soek na die een wat weg is, en watter pa sal sy gehoorsame kind op die agtergrond skuif vir sy soute hel van 'n kind, watter tipe gasheer sal wag tot die einde om sy beste wyn op te tower vir sy gaste?...ek bedoel...dit klink net te silly om sommer oor te vertel!)

Die Engelse woordjie"silly" hou egter 'n baie mooier skat opgesluit in sy verlede. Sely wat beteken "eenvoudig"(simple) of "onskuldig"(innocent). Selfs uit die ou Engelse stam "saelig" spruit nog meer feesvreugde - " happy" of "blessed"!

Dus - as jy vandag soos ek voel dat dit "silly" is om oor Jesus te praat, dink weer, want inderwaarheid is ons die gelukkiges en die geseëndes!

DANKIE VRIENDIN!

2006-10-26T17:31:00.000+02:00

Dae wissel in skakering, Dinsdag was blou...diep-blou, lig-blou , baba-blou, ...blou soos die see...blou my gedagtes ...wie sal verstaan! sing Laurika en ek nog harder saam.

Maar jy vriendin, het daar in die winkel sommer tot in my blou hart in gekyk en verstaan. Dankie vir die tissue wat jy aangebied het, maar ook nie gehad het nie...jy was darem my spieël wat die maskara strepe sou uitwys indien hulle onder my wangbene sit. Dankie dat jy aangebied het om my slegte paaie saam met my te stap, al het jy 'n afspraak gehad vir later, dankie dat ek vir 'n oomblik my muur saam met jou kon omskop en sommer net ons kon wees!

Vandag vier ek fees! Op jou!

NORMAAL...NOOIT!

2006-10-18T12:34:00.000+02:00

Ek's normaal. Sekerlik die normaalste mens wat ek ken. Ek kyk na myself in die spieël en verstaan MY normaliteit, beoordeel ander se abnormaliteit volgens daardie normale mens wat terugstaar vir my in die spieël. Dis tog normaal, nie waar nie?

Eks besig om 'n boek te lees van die Amerikaanse teoloog, Leonard Sweet : "Jesus Drives Me Crazy!: Lose Your Mind, Find Your Soul" (Uitgewer: Zondervan Publishing Company) wat so treffend hierdie beeld in spiëel kom challenge! En kyk net hoe!

Jesus kom aarde toe - na alle normale mense, Hy die abnormale - die Een wat 'n " crazy wisdom " na die wêreld bring en daardeur ons lewens vir goed op sy kop kom draai - Ons roep om ABNORMAAL te wees in 'n normaal-gek wêreld! Jesus roep ons om nie soos hierdie normale wêreld te wees nie, maar abnormaal op te tree soos wat Hy dit vir ons bedoel het en 'n normale wêreld te roep tot vryheid! 'n Lewe waar ons "crazy in love" met God is, met die lewe is!

"When you truly grasp the freeing truth that we do not have to conform to this world, then you can become the crazy, zany, unpredictable, but powerful force for Jesus you were intended to be." dus ABNORMAAL!

Moeilik om te dink ons het 'n lisensie om abnormaal te kan wees! Nogal bevrydend en beslis iets om ons glasies op te lig!

BEBOS!

2006-10-10T11:54:00.000+02:00

Dis 'n lang tyd sedert ek hier kom gesels het - nie omdat daar niks is om te vertel nie, maar sekerlik omdat die lewe net so wispulturig hier om my kom rond dans het in die laaste 2 weke!

Dis dan wat mens bietjie leeg voel as jy binnetoe kyk, en besef dat jy maar min aandag gegee het aan Hart, wat getrou nog hier binne maar aanhou klop en Longe, wat maar so deur die hoes en proes steeds getrou suurstof aan my sawwe lyf voorsien...en Siel wat nog altyd hunker na meer, maar nie ongeduldig wag op sy kos nie...LYF, O SWANGER LYF! Nog net 8 weke! Dan wag ons nuwe uitdagings!

Ek ( EN LYF) voel soos 'n bos...nie 'n bos soos in plantasie-bos nie, eerder die plant-tipe bos! Een wat wild groei, oor 'n muur moet groei, toe moet groei, reg moet groei, maar nou - deurmekaar bos! Geloof my blare wat skadu gee en die Here se liefde die lente blomme op my kroon. Groei is - soos nou vir my - soms deurmekaar, soms stadig, soms sluimerend, maar altyd daar...onsienlik vir die blote oog.

Snoei my Here, tot 'n hartsbos!

SERMONIEMEESTER(es)!

2006-09-27T12:44:00.000+02:00

Liewe geesgenote,

Met kleine Madeleine wat sorgvuldig binne my groei, groei ook talle emosies, "worries" en what-if's" in my maag. Hoe gaan my lewe verander - sekerlik gaan sy by ONS aanpas!? Sy gaan 'n vreugde wees op alle terreine, veral slaap en eet en glimlag vir vreemde tannies in die Pick 'n Pay wat koer oor ons pragtige dogtertjie, ek gaan 'n wonderlike ma wees ( ...vertel ek oor en oor myself en weet ek lieg so bietjie...) my lyf gaan weer sy glorie van vroeër gou-gou terug kry ( verseker ek my geliefde!). Geboorte skenk kan tog nie soooo seer wees nie, geswelde borste is tog nie 'n probleem nie, is dit? Krampwater help vir verkoue ook, nê?!

Paniek!

My Bybel oor die volgende 12 maande na haar geboorte ( Hey Baby! The hip new mom's guide that's all about you" deur Sarah Bullen, uitgegee deur Oshun Publishers) herinner my sag dat dit eintelik wonderlik is om vrou te wees...en in my eie woorde "'n seremoniemeester" te word. En vriendinne...vriende, eggenoot, herinner my asb aan die wonder van ma-wees op dag 3 ( en 300!) nadat ek vir 72 uur nie geslaap het nie, seer is waar dit nog nooit so seer was nie, en hormonaal abnormaal is, dat 'n vrou se reis om haar eie potensiaal te ontdek eers begin die dag as sy ma word...en dat ons dit moet vier!

Bullen skryf in haar boek: " Baby showers, matric dances, 21st parties and weddings. In the long journeys of our lives, those are about the only benchmarks we actively mark and celebrate. And how do we do that? Most often with an open bar, store purchased gifts and lots of money. We have lost the simple art of ceremony, of celebrating the transitions in life, of honouring our own journeys as women through our culture and of creating rites of passages. Never is it more needed than when you become a mom. A rite of passage is a simple act you plan, with intent to usher a new energy, stage or idea into your life. "

" Increasing numbers of young women are looking for ceremonies and traditions to create meaning in their own lives and to mark the passage of their growth. They are creating their own ceremonies and starting, for their own families, a legacy of celebration of life that goes beyond Cardies prepackaged messages. Many women are borrowing ceremonies and traditions from religions, others from age-old practices long forgotten, and others are still creating their own"

Paniekerige feesvreugde
Donette

DIS JOU VERJAARSDAG!

2006-09-26T09:18:00.000+02:00

Vandag verjaar die held in my lewe! Jaco! Die een wat my hart regom kom draai het en my kop reg kom aanskroef het. Die een wat elke dag my laat WIL huistoe gaan en my môre oggend weer laat opstaan. Die een saam met wie 'n leeftyd te min sal wees, die een wat my hart laat klop op 'n manier wat meer as lewe gee! Hy's die een met wie ek al my vrese deel, my vreugdes vier en my eie mislukkings by kan vergeet! Hy's die een wat nie moeilik is om te vergewe nie, die een wat die beste in my uitbring! Hy's myne - maar tog net 'n vlinder wat sag op my hand kom sit, wat ek weet nie altyd myne sal wees nie - Hy's die Here se man!

Verjaarsdae is belangrik - dit gee ons 'n geleentheid om vir die mense om ons uit te sonder en vir een hele dag per jaar die besonderse betekenis wat hulle aan ons lewens gee te vier saam met hulle! Dis 'n dag waarop ons nie net self neem nie, maar 100% gee aan die mense wat ons lewens verryk!

Mag elkeen van julle 'n besonderse dag hê! Veels geluk as dit ook jou verjaarsdag is vandag!

Ps 115:1:"Nie aan ons nie, Here, nie aan ons nie, maar aan u Naam kom die eer
toe, want dit is U wat liefde en trou bewys."

DIT VAT GUTS

2006-09-14T10:00:00.000+02:00

Liewe vriendinne, vriende en geesgenote!

Vanoggend het ek hierdie "kernkrag-pos" ontvang vanaf die e-Kerk. Wat my veral opgeval het is die gedeeltetjie oor getuig - het jy al vandag tyd afgestaan om vir iemand te vertel hoe die Here een van jou gebede verhoor het?

Wel - hier gaan ek!

Ek en Jaco het Maandagaand gebid dat die Here my sal gesond maak van hierdie griep wat nou al van die begin van die swangerskap net te gereeld sy kop uitsteek. Dit kos elke keer nuwe krag om positief te bly as mens se lyf seer gehoes is, jy sleg slaap en sommer net plein goor voel( en nie behandel kan word daarvoor nie!) Wel - vandag voel ek stukke beter! My bors sing nie meer nie en ek kan sommer die lente ook weer ruik! Ek weet die Here verhoor ook ons eenvoudigeste gebede - selfs net om bietjie beter te voel fisies!

Hoop julle het 'n heerlike opwindende dag!

Besoek gerus die e-kerk by www.ekerk.co.za! Dis 'n fees!

Dit kos guts om jou roetine te breek

Geordend, gestruktureerd, bepland – is dit woorde wat jou leefstyl beskryf? Leef jy binne ‘n veilige lewensritme waar alles en almal in plek is? Daar’s niks mee verkeerd nie. Die vraag is net wat doen jy as ‘n onverwagse krisis ‘n snelbal in jou rigting afstuur? Vang die verrassings van die lewe jou onkant? Of is dit geleenthede vir groei op God se pad?

Het jy die guts om vandag as ‘n skoon, nuwe bladsy te sien? Is jy oop en ontvanklik om deur die lewe verras te word? Of is alles so voorspelbaar dat jy selfs al jou eie “verrassings-partytjies” reël? Kan jy nog kinderlik opgewonde raak as jy God se hand raaksien in iemand wat ‘n bekertjie koue water met ‘n ander deel? Of in ‘n onverwagse glimlag, of ‘n vinnige geselsie? Kan jy jouself nog verras deur jou roetine te verander om by ‘n eensame te stop, of vir ‘n geliefde ‘n bos blomme te koop? Sal jy dit waag om ‘n kantoordeur toe te trek om vir ‘n kollega te vertel hoe die Here een van jou gebede verhoor het? Het jy die guts? Of ontwrig sulke stukkies lewe jou roetine te veel?
Vrede

Stephan

HOOGTEVREES!

2006-09-11T09:41:00.000+02:00

Al ooit op die heel boonste binnevlak van die Voortrekkermomument gestaan? Die tralies voel te dun, die staal te swak en die hoogte net te veel!

Die senotaaf daaronder trek my oog aaklig af na wat ek glo verseker nou my dood gaan wees! HOOGTEVREES! probeer my brein dit rasionaliseer - nie so erg nie, maar my lyf sidder en my hart kan nie besluit of ophou klop nie maar miskien beter is as hierdie bonsspring wat hy nou beleef nie! Dis 'n droom, 'n slegte visioen, om my oë oop te maak, maak dit erger!

Koning Nebukadneser weet waarvan ek praat: Heidense koning van weleer:
"Ek, Nebukadnesar, het rustig en voorspoedig in my paleis gewoon,
maar toe het ek 'n droom gehad wat my ontstel het, visioene in my
slaap, wat deur my kop gemaal en my laat bang word het. ... (Daniël 4:4-5)

"HOOGTEVREES!" roep ek stom uit

Daniël 4: 15 "Nebukadnesar moet snags deur die dou natgemaak word en van plante leef saam met die wilde diere. Sy verstand moet anders word as die van 'n mens, hy moet die verstand
van 'n dier kry. Dit moet sewe tydperke lank oor hom kom."

En my stemmetjie binne my kom vertel vir my sagkens:

4:27. "Daarom, U Majesteit, luister na my raad: breek met u sonde en u ongeregtigheid, doen wat reg is en bewys barmhartigheid teenoor die wat in nood is. Dan sal u voorspoed aanhou."

NEE!

4:28. Maar alles het oor koning Nebukadnesar gekom. ...Hy is uit die menslike samelewing uitgestoot en moes gras eet soos beeste. Hy is snags deur die dou van die hemel natgemaak, en sy hare het so lank geword soos die vere van 'n arend en sy naels soos die van 'n voël.

My binneste vrot, en die kraaie wag dat ek ophou keer!

4:34. "Toe die vasgestelde tyd verby was, het ek, Nebukadnesar, na die hemel opgekyk om hulp en het ek my verstand teruggekry. Ek het die Allerhoogste geprys, ek het Hom wat ewig leef, geloof en geëer. Aan sy heerskappy is daar geen einde nie, sy koninkryk bestaan oor al die
geslagte heen. "

HOOGTEVREES...sug ek verlig.Ek gryp die Handreling stewig vas. Ek kruip-loop stadig na die trappies.

4:2."Ek betuig met blydskap dat ek die tekens en wonders wat die allerhoogste God gedoen het, kon belewe. 3. "Hoe groot is sy tekens, hoe magtig sy wonders! Sy koninkryk is 'n
ewige koninkryk, sy heerskappy duur van geslag tot geslag.

Ek buig my neer voor u Here - in hoogtevrees! Ek betuig met blydskap hoe groot U is! Groter as my vrese, U dring my liefdevol tot HOOGTEVREES!

Lees meer oor die Voortrekker monument en die senotaaf by http://www.voortrekkermon.org.za/

LEWE!

2006-09-01T08:16:00.000+02:00

1 September 2006!

Toe ek op 4 April vanjaar 'n tuis-swangerskapstoetsie gedoen het wat homself alte kordaat positief bewys het, het ek half in trane ( van paniek en vrees) na die ou witstinkhout voor my kantoor venster gestaar. Hy het pas begin verkleur...Voor hierdie babatjie kom moet hy nog al sy blare verloor, 'n seisoen-ewigheid kaal in die weer staan, weer blare kry en eers as hy weer sade het...dan eers is hierdie selletjie 'n mensie wat gereed is om haar ouers te ontmoet.

Die ou witstinkhout het seker so 2 weke terug sy lentebui kom aankondig en my herinner aan my gedagtes daardie herfsdag wat toe bietjie meer winterig daarna uitgesien het...maar nou verseker ruik die lewe na lente. Een van die dae kan ek slapies tel tot die groot dag.

My oupa is op 1 September 1996 oorlede, ook van daardie dag, onthou ek slegs die vars reuk in die lug en my ouma wat noem dat "Pa hierdie lekker dag darem ook baie (sou) geniet het". Ek glo dat Oupa daardie dag wel baie geniet het.

Liewe vriendin, vriend, geesgenoot...Vandag vier ek fees! OP DIE LENTE! Op nuwe lewe en die lewe hierna!

KERNKRAG!

2006-08-28T12:53:00.000+02:00

Liewe julle!

Atoom splitsing - dis waarin ek van nou af 'n spesialis wil wees! Om die kleinste deeltjie moontlik te kan laat ontplof in die grootste reaksie ooit! En voortdurend!

Oomblike is soos atome - die kleinste deeltjie van iets baie groters - 'n oomblik is slegs 'n deeltjie van ons toekoms. Almal van ons weet wat gebeur as 'n atoom gesplit word - KABOOMMMM - dis 'n Hirosjima of 'n Koeberg.

Ons kan nie besluit hoe ons die verlede gaan verander nie, maar wel hoe ons die hede gaan split om die toekoms te bepaal. En die hede is net 'n oomblik..nou al weer verby en nou al weer besig met die volgende oomblik...maar daar's hy alweer verby en hier gaan nog een...en hierdie een...

Vandag kies ek om atome te split - om 'n Koeberg vir die toekoms te wees. Ek kies om oomblike te split om Godelike krag oor die aarde te laat golf en die Gees deur my vryheid te gee om te spoel deur die mense om my!

Liefste vriendin...mag jy 'n asemrowende week beleef! Mag jou kosblikkie werk toe lekker vars goedjies in hê, mag jy liewer as ooit voel vir jou man en mag jou kindertjies hierdie week nog meer opvreetbaar wees! Split die oomblik en drink saam met my 'n glasie op die lewe!

PS: Vandag is ek 25 weke swanger met ons eerste! Madeleine - wat beteken "Tall tower". Sy skop gedurig, wriemel haar reg en kruip in my hart in...ek kan nie wag nie!

NET 'N OOMBLIK

2006-08-24T18:56:00.000+02:00

Aan my vriendinne...ook vriende en geesgenote

Die tyd staan nie stil nie! In hierdie maand...om meer presies te wees...op die 18e Augustus was dit presies 6 jaar terug wat ek en my ouers 00:30 in die oggend wakker geword het elk afsonderlik, maar in dieselfde huis , met 'n vuurwapen in die gesig. Die 5 gewapende mans het genadeloos weggestap met meer as ons aardse besittings, maar ook met ons vertroue in die mensdom, ons geloofwaardigheid in 'n regsstelsel en rustige slaap.

Die 3 uur lange oomblik het my lewe om ver gewerp...ek is skaamteloos bang vir die donker.

Vandag, 6 jaar later...het ek 'n wonderlike pad gestap van genade, vergifnis en troos, maar ek slaap steeds met een oog oop...daar is nog die minder gereelde paniekaanval...daar is die vrees vir die volgende keer...

Ek het lewendig daardie aand , arms en bene vasgebind om 3:30 in die straat af gehop na die bure op die oorkanste hoek, nagrokkie aan, onbewus van die laaste van winter wat nog aan die knaag was om hulp te gaan soek...lewendig!

Ons kan nie kies hoe ons sterf nie, ook nie wanneer ons gaan skrik of te pletter teen die grond gaan val van teleurstelling nie, maar ons kan wel kies hoe ons gaan leef.

Vir elke Suid-Afrikaner wat op hierdie oomblik so bewus is van die geweld en misdaad in ons land - kom ons vier fees! Want ons kan kies om steeds te bly glo dat God ons gebede verhoor en dat ons 'n keuse het oor hoe ons gaan leef!

THE GIG!

2006-08-15T18:22:00.000+02:00

Vriendinne!

Ek en my geliefde eggenoot is verlede Vrydagaand sommer op die ingewing van die oomblik na 'n show - of sal ek sommer nou al die woord gig gebruik- van Coenie de Villiers! Voor jy verder vooroordele maak oor ons musieksmaak of die ouderdom van die betrokke musikant, doen jouself tog maar die guns eendag en gaan luister self - beleef self die klavier onder daardie uitmuntende skeppende vingers en die geniale woordkunstenaar agter die mikrofoon! Eenvoudig puik!

Coenie vertel ons toe die ou storietjie van die woord GIG - 'n term wat wêreldwyd klaarblyklik onder alle persone in die vermaaklikheidsbedryf gebruik word vir wat ons gereeld noem "'n show", vertoning, opvoering en ander derglike benamings wat daar ook al mag wees.

Die woordjie GIG het sy oorsprong 'n paar eeue terug in die Suide van Amerika, onder die swart katoenplukkers wat vir 'n appel en ui deur die warm somer moes worstel op die lande. Sommige van die musikales - en in 'n poging om so ietsie ekstra te verdien, het laatmiddag dorpie se kant toe gestaan en op die straathoek gaan stelling inneem. Hier het een die banjo getokkel en die res ingeval met stem. So sou dorpenaars per geleentheid 'n muntstuk in hulle rigting flik - met 'n dankbare hand wat dit vinnig opraap en sag die woorde "God Is Great" uiter. Vandaar die woordie GIG. GOD IS GREAT!

Laat my dink aan Shakespear wat sê dat " all the world is a stage" - ek en jy die akteurs in 'n GIG!

Vandag vier ek fees! Want GOG IS GROOT!

So terloops - met 'n vinnige soektog na die oorsprong van woorde op Google kon ek wel vele ander verklarings vir die woordjie GIG vind, maar nooit Coenie s'n nie. Wel...GOD IS STEEDS GROOT!
Lees gerus bietjie verder oor woorde se oorspronge by http://www.wordorigins.org/

'N PROFEET - EK EN JY!

2006-08-08T12:56:00.000+02:00

Goeie dag Nehemia-Monya, Amos-Marie, Jona-Liesl ...sjo ek sien dis sommer al my vriendinne hier byeen vandag!

Ek bevind myself in uitgelese geselskap! En ek dink elkeen van julle is net so verbaas soos ek dat insluitende jou naam en my naam net sowel Nehemia of Amos kan wees! Of sal ek dit sterker stel - OOK MOET WEES!

My geliefde eggenoot het in die afgelope week met 'n absoluut fasinerende boek huis toe gekom - 'n boek wat net preke bevat met U2-songs se lirieke as tema - Get Up Off Your Knees: Preaching the U2 Catalog Editor: Beth Maynard; Raewynne J. Whiteley. Ja, regte-egte preke soos wat ek en jy Sondag na Sondag in die kerk hoor! Vars bries vir baie van ons wat in die susterskerke groot geword het!

Maar voor ek by U2 kom - eers bietjie oor die profete van toentertyd!

Maak jou oë toe en sien voor jou geestesoog vir Nehemia. Wat sien jy? 'n Gryskop man, effens oorgebuk of jonk met baie energie, vlenter klere of deftig aangetrek, straat prediker of formele predikant? Sprankel in die oog of bietjie terneergedruk? Oopkop of sommer 'n ou moeilike man?

Wat ook al jou prentjie - doen gerus die moeite om die boek Nehemia vir 'n slag te lees!Maak pret van die lees: Lees die geslagsregisters en werkers se name hardop saam met jou man/vriend! - Ek en Jaco het een aand so histeries begin lag dat ons nie meer kon lees nie - nie eens praat van bid na die tyd nie!)
Kom ontmoet 'n man wat in die fleur van sy lewe is - 'n hoë amptenaar ( die SKINKER!) aan die hof van Koning Artasasta - 'n geliefde man by die koningin( hfst 1 vs 6 impliseer die feit dat sy by was toe Nehemia kom vra het om Jerusalem te gaan herbou, reeds die Koning sag gemaak het) maar so ook by die koning self. Ontmoet 'n man wat deur gebed sy HERE ken! Ontmoet 'n man wat ken van skietgebede! Ontmoet 'n man wat hartstogtelik hartseer word oor sy eie mense se sonde en pyn...en daaroor kan sing! Ontmoet 'n man wat vir almal 'n pyn in die gat moes wees so passievol was hy oor die wet! Ontmoet 'n man waarby ons vandag nog kan leer ....hoe om dit te doen en nie te doen nie!

Maar nou om by die profeet storie uit te kom: wat het profete nou eintlik gedoen? Hulle was mense wat in metafore met mense van HULLE TYD gepraat het. Dink maar aan Jeremia wat na die pottebakker se huis moes gaan en tot vandag toe vir ons 'n ander betekenis gegee het van "klei in die Pottebakker se hand" (Jer 18). Profete is mense wat woorde buite die woordeboek plaas - dinge so stel dat mens dit nie meer in die HAT kan opsoek nie! En sulke woorde trek mense in! Boei hulle! Laat hulle verder dink as die boks! Met die vraag los...wat is buite die boks?

Terug by U2 en die boek" Get off your knees". Whitely noem in sy voorwoord dat 'n band soos U2 niks anders is as profete vir vandag nie. Vergeet van die individue van die band en elkeen se sondes waarvoor ons hulle so graag wil kruisig ( kyk maar wat het ons met Jesus self gedoen!) en luister vir 'n oomblik na die woorde wat hulle uitbasuin! U2 trek ons in sy metafore in en praat skaamteloos oor VIGS, oorloë, aardverwarming en hongersnood. U2 trek ons selfs in met hulle blote naam "U2"!

My naam is nie Bono-Donette nie, maar Donette op haar eie kan wel ook tog sekerlik vandag in iemand se lewe die rol van profeet speel! Skaamteloos mense buite die boks plaas - om Christus raak te sien!

Dus Jeremia-Karien en Jesaja-Louise! Kom klink vandag 'n glasie saam met my op PROFETE! Op my en jou! Vier Fees!

UIT ALLES WAT SLEG IS!

2006-08-02T11:59:00.000+02:00

Liewe vriendinne!

Die koue vreet vir oulaas aan ons hier in die Noorde van die sonskynland - winter vir oulaas! En hoeveel belofte hou dit nie in vir 'n heerlike lente wat om die draai is nie! Nuwe dinge! Nuwe kuiers op die stoep, nuwe wandelinge in die strate, laat aand kuiers voor die kaggel word verruil vir laaang Saterdag kuiers voor die braaier!

Ja - uit alles wat skynbaar dood is, ontplof die mooiste blomme van genade! Jesus sê dit self so mooi as Hy oor Sy eie dood praat in Johannes 16: 20 - 21
"Dit verseker Ek julle: Julle sal huil en treur, maar die wêreld sal
bly wees. Julle sal bedroef word, maar julle droefheid sal in blydskap
verander. 'n Vrou kry swaar wanneer haar tyd gekom het en haar kindjie gebore
word. Maar wanneer die kindjie gebore is, dink sy nie meer aan die pyn
nie, so bly is sy dat daar 'n mens in die wêreld gekom het." ( Let op die beloftes in rooi!)

En dan is daar nog 'n belofte uit die seer ook:
"D¡t verseker Ek julle: As 'n koringkorrel nie in die grond val en
sterwe nie, bly hy net een; maar as hy sterwe, bring hy 'n groot oes in." (Joh 12:24)

Jesus sterf aan die kruis...Die KRUIS word vir ons as verlostes 'n teken van DOOD.

Jesus sterf aan die kruis vir ONS...EN LEWE...Die KRUIS word vir ons as verlostes 'n teken van HOOP! Kom ons VIER FEES! Ons klink 'n glasie op 'n Almagtige Here, 'n Broer aan die kruis wat lewe en lewe gee en natuurlik - op HOOP!

Kom vier fees saam met my hierdie week vriendin! 'n Fees te viering van HOOP!

2006-07-26T12:41:00.000+02:00

Aan al my vriendinne in Christus!

Die Here roep mens elke dag op 'n baie spesiale manier om weer na Sy stem te luister. Is dit nie 'n voorreg om Hom te mag ken nie - en dit as onvolmaaktes! Elke dag is ek so bewus van my eie tekortkomings - die eie ek wat weer inkruip, die duisende kere wat ek Hom verloën - maar Sy genade stortvloed elke dag weer neer om ons skoon te was.

Hierdie BLOG rig ek vandag op in die hoop dat ons as mede gelowiges mekaar sal vind ook op die web.Om sodoende mekaar se laste te help dra deur elke eenvoudige dag wat ons stap. Die idee is dat ieder en elk haar hart hier kan kom oopmaak en dat ons met mekaar sal deel - goeie en die slegte, die genade en die beproewinge!

Mag die Here elkeen van ons seën en my gebed is dat hierdie BLOG ook sal groei tot 'n vrugdraende boom - soos net die Tuinier dit verlang!

Liefde in Christus
Donette